بدون مقدمات , احنا نخش على الموضوع على طول
تعمل ايه لو لقيت نفسك فى مرة دخلت خناقة مع واحدة لابسة ملاية لف ( مش عارفة ليه مبقوش بيلبسوها ليه ) و من حى شعبى و سمعتك قصايد ردح و انت دكتور محترم مش عارف ترد ازاى
انا عن نفسى بتخيل نفسى اقتبست دور منى زكى فى فيلم خالتى فرنسا و هاتك يا ردح
عشان كدة بحب اجمع اى قصايد ردح شوفتها فى فيلم و لا قريتها فى اى حتة ( بهزر طبعا بجمعها لانها تتميز بخفة دم جامدة اخر حاجة و تبين خفة دم المصريين حتى فى خناقاتهم )
و فى حاجات بتكون بهزار زى ما هاتشوفوا دلوقتى
الاول : انا وحشة يا مسقطة شبكة يا سمكة واقعة من الشبكة يا اللى حالتك حالة و لا اتعبرتى برسالة ياللى كلك حزن يا فاصلة شحن يا وحشة طحن يا مسد كول يا قدرة من غير فول يا قرد متبنج ياللى قلبك مهنج يا امو عقل شت و عايز يتعمله رى ستارت يا عقب سيجارة فرط . و شوووووبش يا ميكروسوفت
التانى : سمعتها فى تامر و شوقية
يا فردة قديمة يا دقة ياللى الصرصار يشوفك يقولك لأأأأأأأأأأ
التالت : عملالى حلوة و روشة يا عربية مركونة فى الورشة ياللى موتورك عامل دوشة يا خردة يا قديمة يا قرشانة يا اروبة ياللى رخصتك مسحوبة , ياللى بتمشى فى العاكسى و عمرك ما بتتعاكسى و شوووووووبش يا سواقين التاكسى
الرابع : ماتبصليش بعين رضية شوفى ايه اللى مدفوع فيا , 4 و واحد يبقوا 5 عليكى يا ابلتى , يا ابرة مصدية جنب الحيط مرمية يشيلوكى على فرع على طبلية , ( تم حذف جزء ) ياللى صوتك خلى خرم الابرة وسع اطلع من تحت التربيزة ياللى ماتسواش بريزة يا قيحة يا تلقيحة ياللى الشيطان يشوفك يقولك يا قبيحة
المهم اى حد حافظ حاجة من الحاجات دى يضيفها و لو حد يعرف يألف حاجة يحطها بس يرجى احترام قوانين المنتدى و عدم استخدام اى الفاظ خارجة يلا ابتدوا
__________________
لا تعتمد على الصديق فهو نادر
ولا تعتمد على الحبيب فهو غادر
و لكن اعتمد على الله فهو قادر
و ان كانت الدنيا بحر من الهموم فاعبرها بقارب الصبر